Ekipi mjekësor i Klinikës së Kirurgjisë Maksilofaciale në Qendrën Klinike Universitare të Kosovës ka realizuar me sukses një ndërhyrje kirurgjikale të rrallë te një i porsalindur njëjavësh, i diagnostikuar me teratomë kongjenitale orofaringo-nazofaringeale (Epignathus).
Bëhet fjalë për një patologji jashtëzakonisht të rrallë, e cila sipas mjekëve ka incidencë prej rreth 1 në 35.000 deri në 1 në 200.000 lindje të gjalla dhe shoqërohet me rrezik të lartë mortaliteti, deri në 80–100% në rastet kur nuk sigurohen me kohë rrugët e frymëmarrjes.
“Pas diagnostikimit të hershëm dhe sigurimit emergjent të rrugëve të frymëmarrjes nga ekipi i Klinikës së Neonatologjisë, pacienti iu nënshtrua ekzaminimeve të nevojshme radiologjike dhe vlerësimit multidisiplinar. Menaxhimi u realizua nga ekipi i Klinikës së Kirurgjisë Maksilofaciale, në bashkëpunim të ngushtë me ekipet e Neonatologjisë, Anesteziologjisë, Radiologjisë dhe Institutit të Patologjisë”, thuhet në njoftim.
Ndërhyrja kirurgjikale është realizuar nga ekipi i Klinikës së Kirurgjisë Maksilofaciale, nën udhëheqjen e dr. Alban Olluri, me mbështetjen e ekipit të anesteziologëve të udhëhequr nga dr. Agreta Gashi Gecaj.
“Tumori u largua në tërësi, me ruajtjen maksimale të strukturave anatomike përreth dhe pa komplikime intraoperative. Ecuria postoperative ka qenë shumë e favorshme, foshnja merr frymë spontanisht, ushqehet normalisht dhe vazhdon të jetë nën përkujdesjen e ekipeve mjekësore”, thuhet më tej në njoftim.
Sipas QKUK-së, ky rast përbën një nga ndërhyrjet më të suksesshme dhe më të rëndësishme në këtë institucion, duke reflektuar nivelin e lartë të ekspertizës profesionale dhe bashkëpunimit multidisiplinar në trajtimin e patologjive të rralla dhe komplekse tek të porsalindurit.
