Federata e Sindikatave të Shëndetësisë së Kosovës ka shprehur shqetësimin për shtesat e përfituara nga mjekët specialist të kujdesit parësor, dytësor dhe tretësor.
Në reagimin thuhet në këto shtesa nuk janë përfshirë të gjitha kategoritë e sistemit shëndetësor.
“Pas njoftimit të marr nga anëtarësia e saj mbi shtesën e përfituar nga mjekët specialist të kujdesit parësor, dytësor dhe tretësor dhe pas analizës së bërë të nenit 4 paragrafi 1 nënparagrafi 1.4,nenit 30 të Ligjit nr.08/L-196 për pagat në sektorin publik si dhe Rregullores nr.03/2023 për shtesën e nënpunësve të sistemit shëndetësor, shpreh shqetësimin e saj duke qenë se kriteret për marrjen e kësaj shtese bien ndesh me qëllimin e saj. Sepse në këtë rregullore po edhe në Ligj qartazi theksohet se përfitues të kësaj shtese janë gjithë nëpunësit e sistemit shëndetësor që kanë zgjedhur të punojnë në sektorin publik”, thuhet në reagim.
Ata kanë thënë se janë të indinjuar, pasi që nuk janë përfshirë të gjitha kategoritë e tjera të nëpunësve të sistemit shëndetësor duke filluar nga infermierët, mjekët në specializim dhe mjekët e përgjithshëm.
“Duke e parë dhe ditur punën dhe profesionalizimin e të gjitha këtyre kategorive të anashkaluar e me theks të veçantë të infermierëve, përfitimi i kësaj shtese do të ndikonte sado pak në plotësimin e hendekut të krijuar në raport me pagat aktuale”.
Tutje, në reagim thuhet se “frustrimi shtohet edhe më shumë kur ky veprim i realizuar në prag të festave ka ndikuar në shtimin e demotivimit dhe denigrimit të pjesës dërmuese të nëpunësve të sistemit shëndetësor”.
Po ashtu, FSSHK tha se e konsideron si të qëllimshëm gjithë këtë proces.
“FSSHK e siguron të gjithë anëtarësinë e saj se këtë çështje e cila për ne është diskriminuese, do ta atakojë në të gjitha instancat e lejuara me legjislacionin në fuqi”.
