Shoferi i dyshuar që shkaktoi aksidentin e rëndë në fshatin Shushicë të Istogut, ku humbën jetën dy persona dhe tre të tjerë u lënduan, është ndaluar për 48 orë me urdhër të Prokurorit të Shtetit.
Sipas Policisë së Kosovës, aksidenti ka ndodhur më 20 korrik, rreth orës 15:20, ku janë përfshirë dy vetura me targa vendore.
Si pasojë e përplasjes, një person ka humbur jetën në vendin e ngjarjes, ndërsa viktima e dytë ka ndërruar jetë pasi është dërguar në Emergjencën e Spitalit Rajonal në Pejë. Tre persona të tjerë kanë pësuar lëndime dhe janë duke marrë trajtim mjekësor.
“Në vendin e ngjarjes ka vdekur një person, këtë e ka konstatuar ekipi mjekësor, ndërsa viktima e dytë e këtij rasti ka arritur pa shenja jete në Emergjencën e Spitalit Rajonal në Pejë. Tre persona të lënduar në këtë aksident janë duke u trajtuar në spitalin rajonal në Pejë”, thuhet në njoftimin e Policisë së Kosovës.
Policia bëri të ditur se trupat e pajetë të viktimave janë dërguar në Institutin e Mjekësisë Ligjore në Prishtinë për obduksion, ndërsa i dyshuari është ndaluar me urdhër të Prokurorit të Shtetit.
“Me urdhër të prokurorit të Shtetit, i cili po ashtu ishte në vendin e ngjarjes, trupat e pajetë të viktimave dërgohen në Institutin e Mjekësisë Ligjore në Prishtinë për obduksion, ndërsa i dyshuari ndalohet për 48 orë. Rasti është duke u hetuar nga hetuesit e aksidenteve”, thuhet në njoftimin e Policisë.
Rasti po hetohet nga njësia për hetimin e aksidenteve të trafikut, me qëllim zbardhjen e plotë të rrethanave që çuan deri te aksidenti tragjik.
