Prokuroria Speciale e Republikës së Kosovës ka ndaluar për 48 orë personin me inicialet S.R., i dyshuar për veprime të kundërligjshme ndaj pjesëtarëve të KFOR-it dhe Policisë së Kosovës.
“S.R. është arrestuar nga hetuesit e Drejtorisë për Hetimin e Krimeve të Rënda në Zveçan, me urdhër të Prokurorisë Speciale. Ai dyshohet për veprat penale: bashkim për veprimtari kundërkushtetuese, rrezikim të personave nën mbrojtje ndërkombëtare, pjesëmarrje në turmë që kryen vepër penale, huliganizëm dhe sulm ndaj personit zyrtar”, thuhet në njoftim.
Sipas njoftimit, gjatë kontrollit në vendbanimin e të dyshuarit janë gjetur prova materiale që do të përdoren gjatë procedurës penale. Brenda afatit ligjor, Prokuroria do të parashtrojë kërkesë për caktimin e masës së paraburgimit ndaj S.R. në Gjykatën Themelore në Prishtinë.
“Hetuesit dhe Prokuroria Speciale po vazhdojnë të ndërmarrin të gjitha veprimet hetimore në përputhje me ligjin”, thuhet në njoftim.
