Por, të mërkurën Qeveria e Serbisë njoftoi se ka miratuar një rregullore të re.
Në nenin 5 të kësaj rregulloreje, thuhet se sipas marrëveshjes së Brukselit të arritur me 23 nëntor, Rashka nuk do të lëshojë më targa për Kosovën.
“Ministria e Punëve të Brendshme, sipas regjistrit, nuk do të lëshojë më targa me shenja regjistrimi nga nenin 2 të kësaj rregulloreje derisa të arrihet një zgjidhje e përhershme për këtë çështje në kuadër të Dialogut”, thuhet në njoftimin e Qeverisë së Serbisë.
Por, kjo zyre sipas qeverisë serbe, do të vazhdojë të jetë aktive.
“Me miratimin e kësaj rregulloreje, të gjitha automjetet me targa KM, PR, GL dhe emrat e qyteteve tjera serbe në rajonin e Krahinës Autonome të Kosovës dhe Metohisë, tash e tutje do t’u vazhdohet regjistrimi”, thuhet në njoftim.
Politikani serb, Aleksandër Arsenijeviq thotë se me këtë rregullore, qytetarët serbë tani do të paguajnë vetëm për kontrollimin teknik dhe sigurimin e veturave.
“Me këtë dekret të Qeverisë së Republikës së Serbisë, automjetet tona me targa me shkurtesa të qyteteve të Kosovës marrin status të ngjashëm si makina bujqësore të regjistruara. Ky quhet regjistrim i përhershëm, por në dokument thuhet se afati i regjistrimit të përhershëm është i kufizuar derisa të arrihet një marrëveshje e përhershme për targat. Mbetet e paqartë se si do të lëvizin automjetet kur kalojnë kufijtë jashtë vendit pa ngjitësit e vlefshëm, vetëm nëse do të lëshohej një stiker special që do të ishte një zgjidhje adekuate”, tha ai.
Ndërkohë, Tëvë1 ka pyetur në Zyrën e Bashkimit Evropian, se pse shteti serb pajisi me targa ilegale qytetarët e veriut, edhe dy javë pasi palët në Bruksel, u pajtuan që kjo të ndërpritet.
Por, edhe një herë zyra e BE-së, nuk pati përgjigje për këtë.
Televizioni ka kërkuar sqarime edhe në Zyrën e Kryeministrit.
Ndërsa edhe këta nuk kthyen përgjigje të enjten.
Tëvë1 një javë më parë ka qëndruar në Rashkë të Serbisë, ku raportoi se pala serbe nuk po e respektonte marrëveshjen e arritur mes kryenegociatorëve në Bruksel.
Kronika e gazetarit Fidan Zejnullahu.
