Prokuroria Themelore në Ferizaj ka bërë të ditur se me vendim të Prokurorit është ndaluar për 48- orë një person i dyshuar për dhunim të një vajze.
Sipas, Prokurorisë i ndaluari dyshohet se kishte marrë me veturën e tij vajzën dhe në një motel kishte kryer marrëdhënie seksuale dhe kishte ushtruar dhunë fizike.
“Ekziston dyshimi se i njëjti e kishte marrë me veturë viktimën dhe dyshohet se ka kryer marrëdhënie seksuale me të në një motel si dhe ndaj të njëjtës ka ushtruar dhunë fizike, andaj,me këto veprime, dyshohet se ka kryer veprën penale ‘Dhunimi” nga neni 227 të Kodit Penal të Republikës së Kosovës. Viktima dyshohet se ka ngecje në zhvillim mendor dhe e njëjta nga familjarët e saj ditë më parë është raportuar e zhdukur”, thuhet në komunikatën e Prokurorisë Themelore të Ferizajt.
Bëhet e ditur se nga hetuesit rajonal të Policisë, viktima është dërguar fillimisht në Urgjencën e Kaçanikut ku i është dhënë ndihma mjekësore dhe më pas e njëjta është dërguar për ekzaminim gjinekologjik në Institutin e Mjekësisë Ligjore në Prishtinë.
Prokuroria Themelore në Ferizaj, ndaj të dyshuarit, brenda afatit ligjor do të parashtrojë kërkesë për caktimin e masës së paraburgimit në Gjykatën kompetente.
