Prokuroria Themelore në Prishtinë ka njoftuar se katër punëtorë, instruktorë të poligonit të Drenit në Prizren, janë ndaluar nën dyshim për veprën penale “Falsifikim i dokumentit zyrtar”.
Sipas njoftimit, me urdhër të Prokurorit të Shtetit, personat me inicialet S.B., R.M., H.N. dhe B.G. janë dërguar në mbajtje për 48 orë.
“Më konkretisht, ata dyshohen se kanë kryer veprën penale ‘Falsifikim i dokumentit zyrtar’ sipas nenit 427 të Kodit Penal të Republikës së Kosovës, si dhe veprën penale ‘Rastet e posaçme të falsifikimit të dokumenteve’ nga neni 391 i KPRK-së. Dyshohet se këto veprime janë kryer në vazhdimësi dhe ndërlidhen me rastin që është në hetim ndaj zyrtarëve në Ministrinë e Punëve të Brendshme (MPB),” thuhet në njoftim.
Prokuroria ka bërë të ditur se veprimet e mëtejshme ligjore do të ndërmerren, ndërsa hetimet lidhur me këtë çështje penale do të vazhdojnë në koordinim me Policinë e Kosovës.
“Hetimet do të vazhdojnë në koordinim me Policinë e Kosovës, ndërsa Prokuroria do të ndërmarrë të gjitha veprimet e nevojshme ligjore,” tha njoftimi i Prokurorisë.
Ky veprim vjen si pjesë e hetimeve për rastet e dyshuara të falsifikimit të dokumenteve brenda institucionit të MPB-së.
