Policia e Kosovës ka ndaluar dy persona në raste të ndara në veri të vendit, pasi dyshohen se kanë kaluar ilegalisht kufirin ndërmjet Kosovës dhe Serbisë.
Rasti i parë është regjistruar të martën rreth mesditës në pikën kufitare në Jarinjë, ku është ndaluar një shtetas i Serbisë.
“Raportohet se është ndaluar i dyshuari mashkull, shtetas i Serbisë, pasi që i njëjti ka kaluar ilegalisht kufirin Serbi-Kosovë. Pas intervistimit, me vendim të prokurorit, i dyshuari është liruar dhe rasti shkon në procedurë të rregullt”, thuhet në raportin 24-orësh të Policisë së Kosovës.
Ndërkaq, rasti i dytë ka ndodhur mbrëmjen e së martës në fshatin Koshuticë të Leposaviqit, ku policia ka ndaluar një shtetas të Kosovës, i cili po ashtu dyshohet se kishte kaluar ilegalisht kufirin.
“Raportohet se është ndaluar i dyshuari mashkull kosovar, pasi që i njëjti ka kaluar ilegalisht kufirin Serbi-Kosovë. Pas intervistimit, me vendim të prokurorit, i dyshuari është liruar dhe rasti shkon në procedurë të rregullt”, njofton Policia.
Në të dy rastet është iniciuar procedurë penale për veprën “Kalim ilegal i kufirit”.
