Sot, është ndarë nga jeta regjisori, aktori dhe pedagogu i njohur Atdhe Gashi, në moshën 86-vjeçare.
Ceremonia e varrimit do të mbahet nesër, më 19 tetor, në varrezat e qytetit të Prishtinës, në orën 13:00.
Atdhe Gashi u lind më 10 shkurt 1939 në Tiranë. Arsimin fillor dhe të mesëm e kreu në Mitrovicë, ndërsa studimet universitare i përfundoi në Fakultetin e Arteve të Bukura për Teatër, Film dhe Televizion, dega Regji, në Lubjanë në vitin 1972, ku diplomoi në klasën e profesorit Miran Herzog me veprën “Darsma e përgjakur” të Federico García Lorca-s.
Pas studimeve, u punësua si aktor në Teatrin Krahinor. Si dashamirës i kulturës dhe artit, formoi Shoqërinë Kulturore Artistike “Bajram Curri” dhe ishte udhëheqës i Orkestrës Simfonike të Prishtinës. Gashi kontribuoi për rreth dy dekada në Radio Prishtina, ku realizoi qindra radio-drama për të rritur dhe fëmijë.
Si regjisori i parë i diplomuar në Kosovë, realizoi mbi 100 vepra të dramaturgjisë botërore dhe asaj kombëtare. Ndër veprat e tij më të njohura janë: “Shoku Gaf”, “Zoti Shoku Gaf”, “Valixhen e ke te dera”, “Vetëvrasja në ditëlindje”, “Mirë u pafshim”, “Ditëlindja”, “Komplotistët”, “Martesa e Palucit”, “Dashnori juridik”, “Ah, populli im” dhe shumë të tjera.
Në fushën e arsimit, Atdhe Gashi dha mësim në Shkollën e Lartë Pedagogjike në Prishtinë, në degën e Dramës.
Pas përjashtimit nga puna dhe mbylljes së institucioneve kulturore nga regjimi serb, themeloi “Teatrin shëtitës”, përmes së cilit u përpoq të mbushte boshllëkun e lënë në jetën kulturore, duke shfaqur drama dhe komedi satirike anembanë vendit.
Kontributi i tij i gjithanshëm do të mbetet një pjesë e çmuar e historisë së teatrit dhe kulturës në Kosovë.
