Nëpërmjet kësaj mase synohet që çdo familje të ketë së paku një të punësuar.
Për gjashtë muaj ekzekutivi do t’i subvencionojë bizneset deri në 70 % të pagës për çdo të punësuar që vjen nga familjet që aktualisht nuk e kanë asnjë anëtar në punë.
Megjithatë njohës të ekonomisë nuk po e shohin këtë masë si vendim të duhur.
Ekonomisti, Muhamet Spahiu vlerëson se me 10 milionë euro mund të mbulohen pagat vetëm për një muaj.
“Nëse i kanë nda veç 10 milionë për këtë masë unë mendoj që është shumë e pamjaftueshme për shkak se vetëm një kategori sociale, pra veç ata që marrin asistencë sociale janë mbi 25 mijë familje. Tash 25 mijë familje me një pagë mesatare prej 400 euro bëjnë 10 milionë euro vetëm për një muaj”, tha Spahiu.
Ndërkaq profesori i ekonomisë, Ermal Lubishtani thotë se ka dilema nëse masa është e qëndrueshme teksa alarmon për mundësinë e keqpërdorimeve vetëm që të përfitohet nga kjo masë.
“Është një periudhë shumë e shkurtë, është 6 mujore. E dyta, kriteret aty janë që të paktën një familje të ketë një të punësuar, tash frika ime është që ka me u rrit numri i familjeve në njëfarë forme, që të krijohen më shumë familje që të themi se jemi asnjë anëtar i punësuar, prandaj duhet të përfitojmë prej kësaj mase. Nëse në fazën që po operojnë tash bizneset, nëse ata kanë nevojë për një punëtor shtesë unë jam i gatshëm që ata mund ta punësojnë pa një masë të tillë”, tha ai.
Personat që duhet të përfitojnë nga kjo masë duhet të regjistrohen si të papunë në Agjencinë Qendrore të Punësimit, teksa subvencionimi do të bëhet për 6 muaj rresht.
Raporti i gazetarit Gojart Jashari.
