Los Angeles Lakers po kalon një periudhë shqetësuese, duke pësuar humbjen e katërt në pesë ndeshjet e fundit. Këtë herë, skuadra nga Kalifornia u mposht në shtëpi nga Detroit Pistons me rezultatin 128:106.
Detroit u udhëhoq nga Cade Cunningham, i cili shkëlqeu me 27 pikë, 11 asistime dhe pesë kërcime, duke e çuar ekipin drejt fitores së 25-të sezonale, kundrejt vetëm tetë humbjeve. Nga ana tjetër, bilanci i Lakers tani është 20 fitore dhe 11 humbje.
Në një tjetër ndeshje, Los Angeles Clippers dhuruan spektakël duke e mposhtur bindshëm Sacramento Kings me rezultatin 131:90. Kawhi Leonard ishte protagonisti kryesor me 33 pikë, duke udhëhequr ekipin drejt një fitoreje të lehtë.
Drama më e madhe e mbrëmjes u pa në përballjen mes Memphis dhe Philadelphia, e cila u vendos vetëm pas kohës shtesë. Philadelphia triumfoi 139:136, falë paraqitjeve të shkëlqyera të Joel Embiid dhe Tyrese Maxey, të cilët shënuan nga 34 pikë secili.
