NATO ka marrë vendim për angazhim të Forcës Operacionale Rezervë për Ballkanin Perëndimor, si rrjedhojë e trazirave të fundit në veri të vendit.
Sipas njoftimit, kjo po bëhet edhe për shkak të lëndimit të 30 ushtarëve të KFOR-it, përcjell teve1.info
Numri i pjesëtarëve të KFOR-it të lënduar dje gjatë protestave në Zveçan ka shkuar në 30. Sipas njoftimit të tyre, 11 ushtarë nga kontingjenti italian dhe 19 nga kontingjenti hungarez kanë pësuar lëndime të shumta, duke përfshirë thyerje dhe djegie nga mjetet ndezëse shpërthyese të improvizuara.
Tre ushtarë hungarezë u plagosën nga përdorimi i armëve të zjarrit, teksa bëhet e ditur se lëndimet e tyre nuk janë të rrezikshme për jetën.
Protestat e qytetarëve serbë në tri komunat veriore po vazhdojnë edhe sot.
Betimi i kryetarit të Zveçanit, Ilir Peci, atij të Zubin Potokut, Izmir Zeqiri dhe të parit të Leposaviqit, Lulzim Hetemi, ka bërë që situata në këto tri komuna veriore të jetë e tensionuar.
Që nga dita e premte, qytetarë të shumtë serbë kanë protestuar para këtyre tri objekteve komunale, teksa dje pati edhe sulme të dhunshme ndaj KFOR-it, si dhe ndaj gazetarëve. /Teve1.info/
