Organizata e Traktatit të Atlantikut Verior (NATO) ka lëshuar një deklaratë zyrtare pas përfundimit të vizitave të Sekretarit të Përgjithshëm, Mark Rutte në Sarajevë e më pas në Prishtinë.
Në deklaratë thuhet se NATO konfirmon angazhimin e saj për stabilitetin e Ballkanit Perëndimor.
“NATO ka mbështetur paqen dhe stabilitetin në rajonin e Ballkanit Perëndimor për tridhjetë vjet; angazhimi ynë mbetet i fortë edhe sot, i udhëhequr nga KFOR-i, i cili është misioni ynë më i gjatë dhe aktualisht më i madh. Nën udhëheqjen e shkëlqyer të Gjeneral Major Enrico Barduani, trupat tona të KFOR-it punojnë pa u lodhur për të siguruar një mjedis të sigurt dhe të qëndrueshëm për të gjithë njerëzit dhe komunitetet që jetojnë në Kosovë, në përputhje me mandatin afatgjatë të OKB-së për KFOR-in; ndërkohë, Ekipi Këshillimor dhe i Ndërlidhjes i NATO-s vazhdon të mbështesë organizatat e sigurisë në Kosovë, përmes ndërtimit të kapaciteteve, arsimit dhe koordinimit të trajnimeve; një rajon i sigurt i Ballkanit Perëndimor do të thotë më shumë siguri në të gjithë hapësirën Euro-Atlantike”, tha Sekretari i Përgjithshëm Rutte.
Ndër tjerash thuhet se NATO do të vazhdojë të luajë rolin e saj, në bashkërendim të ngushtë me Policinë e Kosovës dhe Misionin e BE-së për Sundimin e Ligjit në Kosovë.
“NATO do të vazhdojë të luajë rolin e saj, në bashkërendim të ngushtë me Policinë e Kosovës dhe Misionin e BE-së për Sundimin e Ligjit në Kosovë, secili në rolin e tij si garantues i sigurisë”, shtoi ai.
Rutte gjatë vizitës në Kosovë theksoi edhe rëndësisë e politikës, ku përmendi dialogun Kosovë–Serbi, duke thënë se NATO do të vazhdojë të mbështesë plotësisht normalizimin e marrëdhënieve mes të dyja palëve.
“Zgjidhja që çon në paqe afatgjatë është politike; NATO do të vazhdojë të mbështesë plotësisht normalizimin e marrëdhënieve midis Beogradit dhe Prishtinës, të udhëhequr nga Bashkimi Evropian; kjo është e vetmja mënyrë për të zgjidhur çështjet e hapura dhe për të siguruar një të ardhme të qëndrueshme, duke garantuar që të drejtat e të gjitha komuniteteve të respektohen dhe mbrohen; për të çuar përpara Dialogun, të dyja palët duhet të tregojnë fleksibilitet, të bëjnë kompromiset e nevojshme dhe të fokusohen në përfitimet afatgjata”, theksoi ai./teve1.info/
