Pas katër viteve aventurë, Hamdi Namani nuk do të jetë më pjesë e Dritës. Mesfushori me anë të një postimi në rrjetin e tij Facebook, ka njoftuar shkëputjen e marrëveshjes me klubin gjilanas.
28-vjeçari ka komunikuar se ndërprerja e marrëveshjes me Dritën ka qenë me marrëveshje të dyanshme. Futbollisti gjithashtu ka falënderuar skuadrën e Dritës për katër edicionet që i ka kaluar, përfshirë këtu bashkëlojtarët dhe tifogrupin “Intelektualët”.
28-vjeçari në verën e vitit 2019 iu bashkua Dritës nga Llapi dhe me ekipin nga Gjilani arriti ta fitojë titullin e kampionit të Kosovës. Në edicionin e fundit, në të cilën Drita doli nënkampione, Namani ka regjistruar 31 paraqitje në Superligën e Kosovës.