Naim Murseli, i akuzuar për vrasjen e bashkëshortes së tij, Liridona Ademaj, ndodhet prej shtatë ditësh në Institutin e Psikiatrisë Forenzike në Prishtinë, ku po i nënshtrohet ekzaminimit psikiatrik.
Drejtori i institutit, Shpend Haxhibeqiri, ka konfirmuar për Tëvë1 se qëndrimi i Murselit në këtë institut do të vazhdojë derisa të përfundojë ekzaminimi i plotë dhe sa kohë që mjekët e konsiderojnë të nevojshme.
Të premten në mëngjes, Murseli është transferuar nën përcjellje të Policisë në Klinikën e Neurologjisë në QKUK, për procedura shtesë mjekësore, dhe më pas është kthyer në Psikiatri Forenzike.
Kërkesa për ekzaminim mendor u bë nga mbrojtja e Murselit dhe u miratua më 4 qershor nga trupi gjykues. Avokatja e tij, Teuta Zhinipotoku, e arsyetoi kërkesën me pretendimin se klienti i saj po shfaqte shenja të gjendjes psikiatrike të paqëndrueshme.
Gjykata Themelore në Prishtinë lëshoi urdhëresë më 9 qershor që Instituti i Psikiatrisë Forenzike ta realizojë ekzaminimin.
