Mbrojtja e kryeshefit të pezulluar të Korporatës Energjetike të Kosovës, Nagip Krasniqit, ka kërkuar lirimin e tij nga paraburgimi, por që është refuzuar nga Gjykata e Apelit.
Në aktvendimin të cilin e ka publikuar avokati, Virtyt Ibrahimaga, thuhet se ankesa është refuzuar si e pabazuar, ndërsa aktvendimi i ankimuar të vërtetohet.
Ibrahimaga, përmes një postimi në Facebook ka shkruar se ky aktvendim është i panënshkruar nga gjyqtari i shënuar, kurse data e vendimit është më 05.05.2023.
“Gjykata ne Apelit, ashtu sikur edhe Gjykata Themelore i beson prokurorise ne fjalë të saj, sa i perket pretendimit për dyshimin e bazuar për vepër penale. Prokuroria nuk i ka dorëzuar gjykatës dhe mbrotjës asnjë provë të vetme lidhur me kete rast. Neni 184 i Kodit të Procedurës Penale të Kosovës, lidhur me caktimin e paraburgimit kërkon eksiistimin e dyshimit te bazuar për kryerjen e veprës penale”, ka shkruar ai.
Avokati ka thënë se Gjykata Themelore dhe ajo e Apelit besueshmërinë për paraburgim si duket e mbështetin në pretendimet e Prokurorisë, pa pasur nevojë për t’i shqyrtuar provat.
“Sa i përket masës së paraburgimit, Gjykata e Apelit konsideron se Nagip Kransiqi duhet të qëndroj gjithsesi në paraburgim, sepse mund të ndikoj tek 5 dëshmitare. Cilët dëshmitarë nuk janë intervistuar deri me tani, gjykatës si duket nuk i intereson. Megjithatë fakt është se te gjithë dëshmitarët të cilët prokuroria i ka emëruar në propozimin e saj janë intervistuar nga hetuesia, muaj më parë dhe pas intervistimin kanë vazhduar të punojnë ne të njëjtën korporate ku Nagip Krasniqi ka qenë epror i tyre, pa asnjë ndikim. Kurse masat e tjera si arresti shtëpiak nuk po e parandalojkan ndikimin e dëshmitarëve. Sipas kësaj logjike, secili i i dyshuar në të ardhmen, i cili sipas pretendimit të prokurorisë, pa mbështetje ne ndonjë provë asnjë- dëshmi të dorëzuar dyshohet për vepër penale duhet të dergohet në paraburgim deri sa prokuroria të përfundoj hetimet”, ka shkruar mes tjerash ai.
Në aktvendim thuhet se Gjykata vlerëson se ekziston dyshimi i bazuar se Krasniqi ka kryer veprën penale me të cilën ngarkohet si në kërkesën për caktimin e masës së paraburgimit, që është paraqitur nga ana e Prokurorisë Speciale, e ku thuhet se ka keqpërdorur detyrën e tij zyrtare. /teve1.info/
