Shefja e Grupit Parlamentar të Lëvizjes Vetëvendosje, Arbërie Nagavci, ka pritur në takim ambasadorin e Hungarisë në Kosovë, László István Dux.
Pas takimit, Nagavci ka bërë të ditur se në fokus të diskutimit kanë qenë marrëdhëniet ndërmjet Kosovës dhe Hungarisë, si dhe mundësitë për thellimin e bashkëpunimit bilateral.
Ajo ka vlerësuar mbështetjen që Hungaria i ka dhënë Kosovës ndër vite, duke veçuar bashkëpunimin në fushën e arsimit dhe mundësitë që u ofrohen të rinjve kosovarë për të studiuar në Hungari.
“Prita sot në takim ambasadorin e Hungarisë në Kosovë, z. László István Dux, me të cilin zhvilluam një bashkëbisedim për marrëdhëniet ndërmjet dy vendeve dhe mundësitë për thellimin e bashkëpunimit bilateral”, ka shkruar Nagavci.
Ajo ka bërë të ditur se gjatë takimit është diskutuar edhe për perspektivën evropiane të Kosovës, avancimin e proceseve integruese dhe anëtarësimin e vendit në organizatat ndërkombëtare.
“Diskutuam gjithashtu për perspektivën evropiane të Kosovës, rëndësinë e avancimit të proceseve integruese dhe anëtarësimin në organizatat ndërkombëtare”, ka theksuar ajo.
Në fund, Nagavci ka ritheksuar përkushtimin e Kosovës për forcimin e marrëdhënieve me Hungarinë, duke falënderuar ambasadorin Dux për vizitën dhe, siç e ka cilësuar, bisedën konstruktive.
“Kosova mbetet e përkushtuar për forcimin e marrëdhënieve me Hungarinë, mbi bazën e respektit të ndërsjellë, bashkëpunimit dhe interesave të përbashkëta. E falënderova ambasadorin Dux për vizitën dhe bisedën konstruktive”, ka shkruar Nagavci në Facebook.
