160 çerdhe të reja ishte premtimi i përfshirë në programin e Lëvizjes Vetëvendosje në fushatën ne fundit elektorale. Mirëpo, tani në 3 vjet qeverisje është vendosur gurthemeli i vetëm 4 çerdheve.
Sa i përket kësaj, Ministrja e Arsimit, Shkencës dhe Teknologjisë, Arbërie Nagavci, tha se kjo çështje është angazhim i përditshëm i Qeverisë, teksa e konfirmoi që ndërtimi i atyre çerdheve s’ka shkuar në ritmin që kanë premtuar.
“Ky është angazhim i joni i përditshëm, s’kanë shkuar me ritmin që ne kemi pasur dëshirë dhe konsiderojmë që janë të nevojshme. Ne kemi bërë një vlerësim për nevojën për ndërtim të infrastrukturës, pas marrjes së mandatit, kemi bërë një analizë të detajuar të bazuar në të dhënat e Agjencisë së Statistikave, për nevojat e çerdheve për secilën prej komunave në Kosovë. Në mandatin tonë, për më pak se tri vite, janë ndërtuar dhe kanë qenë në proces të ndërtimit 34 çerdhe”, deklaroi Nagavci në emisionin “Këndi i Debatit”.
E pyetur pse janë funksionalizuar 40 çerdhe e nuk u bën edhe 120 tjera, Nagavci konsideroi që përgjatë këtyre 3 viteve, s’kanë asnjë kërkesë të ndonjë komune, të cilën nuk e kanë plotësuar.
Madje, ajo tha se Qeveria s’ka pasur asnjëherë mungesë të buxhetit për ndërtimin e çerdheve, teksa bëri të ditur se fillimisht duhet të ketë kërkesë nga komuna për t’u nisur një objekt i ri.
“Ne kemi ndarë buxhetin e nevojshëm dhe të mjaftueshëm për ndërtimin e çerdheve, asnjëherë s’kemi pasur mungesë të buxhetit për ndërtim të tyre. Nëse ne si ministri kemi buxhet dhe duam të ndërtojmë një çerdhe, pronësia dhe të gjitha të drejtat, janë fillimisht nga ana e komunës, neve duhet të na vijë kërkesa nga komuna për ndërtimin e një çerdhe, e bashkë me kërkesën është obligim ligjor që komunat të identifikojnë lokacionin për ndërtimin e çerdheve. Gjatë këtyre tre viteve të qeverisjes, s’kemi pasur asnjë kërkesë të asnjë komune të cilën ne nuk e kemi plotësuar”, potencoi tutje Nagavci në Tëvë1.
Ndër të tjerash, ministrja tregoi se kanë mbajtur takime të rregullta me drejtoritë komunale të arsimit, në mënyrë që t’iu mundësohet fillimi i ndërtimit të çerdheve./teve1.info/.
