Ministrja në detyrë e Arsimit, Arbërie Nagavci, ka bërë të ditur se deri më tani janë pranuar gjithsej 144,337 aplikime për subvencionimin e librave shkollorë, vetëm gjatë gjashtë ditëve që nga hapja e sistemit të aplikimit përmes platformës e-Kosova.
Sipas saj, deri më tani janë verifikuar 73,064 aplikime, ndërsa procesi po zhvillohet pa pengesa dhe nuk është pranuar asnjë ankesë nga prindërit.
“Ky proces po realizohet me sukses në bashkëpunim me Agjencinë e Shoqërisë së Informacionit (ASHI). Verifikimi i aplikimeve nga koordinatorët e shkollave po zhvillohet në mënyrë të rregullt dhe të organizuar,” ka deklaruar Nagavci.
Ajo ka shtuar se angazhimi dhe efikasiteti në menaxhimin e procesit tregojnë për funksionalitetin dhe transparencën e tij.
Ministrja në detyrë ka ftuar të gjithë prindërit dhe kujdestarët që ende nuk kanë aplikuar, të përfitojnë nga kjo mundësi përmes platformës e-Kosova.
