Shefja e Grupit Parlamentar të Lëvizjes Vetëvendosje, Arbërie Nagavci, ka deklaruar se procesi i zgjedhjes së presidentit po pengohet nga disa deputetë, duke aluduar në opozitën parlamentare.
Nagavci ka thënë se në diskursin politik shpesh mungon guximi për të thënë të vërtetën, duke iu referuar edhe mendimit të akademikut Rexhep Qosja.
“Një nga temat që e përshkon mendimin e tij është pikërisht kjo: mungesa e guximit për të thënë të vërtetën kur ajo është e vështirë. Për të, problemi nuk ishte se e vërteta nuk dihej. Problemi ishte se shpesh ajo nuk thuhej. Dhe kur nuk thuhet, ajo zëvendësohet me justifikime”, ka thënë Nagavci.
Ajo ka shtuar se kritikat e Qosjes ndaj politikës mbeten aktuale edhe sot.
“Kjo është arsyeja pse Rexhep Qosja do të mbetet përjetësisht aktual. Sepse ai nuk e kritikoi vetëm kohën e vet, por një mënyrë të të bërit politikë që, për fat të keq, vazhdon të shfaqet edhe sot. Pra, shmangia e vendimit, relativizimi i përgjegjësisë, zëvendësimi i qëndrimit me kalkulim”, është shprehur ajo.
Nagavci ka theksuar se zgjedhja e presidentit duhet të jetë rezultat i një procesi të rregullt dhe institucional.
“Presidenti duhet të dalë nga një proces i rregullt. Shteti nuk pret, ai kërkon vendime. E dimë të gjithë se çfarë do të kishte thënë Qosja sot këtu, nëse do të ishte në sallë”, përfunduar Nagavci.
