Përmes një postimi në Facebook, ajo vlerësoi se nuk ka asnjë arsye për një grevë të tillë për shkak se Qeveria ka bërë disa hapa dhe ka ndërmarrë vendime të dinjitetshme për adresimit e kërkesave të sindikatave.
“Është viti i tretë radhazi që java e dytë e shtatorit i gjen nxënësit në shtëpi. Në dy vitet e kaluara kjo ndodhi për shkak të pandemisë, e cila çrregulloi edhe procesin edukativo-arsimor, duke shkaktuar humbje të mëdha mësimore. Ndërkaq, këtë vit vonesa po ndodhë për arsye që lehtësisht kanë mundur të shmangen, e që kanë rezultuar me humbjen e rreth 580 mijë orëve të mësimit në 7 ditët e grevës së organizuar nga BSPK dhe SBAShK”, thuhet ndër tjerash në postim.
Sipas saj, paralajmërimet për moszëvendësimin e orëve dhe kushtëzimin e dialogut të mëtutjeshëm vetëm sa e ndërlikojnë situatën.
Madje, ajo ka kërkuar nga kryesia e SBASHK-ut që të reflektojë për situatën e krijuar duke bërë thirrje kështu që t’i kthehen punës.
“Si Ministre, punonjëse e arsimit dhe qytetare e këtij vendi kërkoj nga kryesia e SBAShK-ut që të reflektojë për situatën e krijuar dhe, bashkë me përfaqësuesit e degëve komunale, ta ftojë anëtarësinë e vet për t’iu kthyer punës, në mënyrë që të krijojmë atmosferë për vazhdimin e dialogut konstruktiv, që është parakusht për zgjidhjen e problemeve komplekse në sektorin e arsimit. Arsimi, në radhë të parë, është çështje e përmbajtjes dhe cilësisë, për të cilën e kemi obligim që të punojmë të gjithë bashkë dhe të sigurojmë të ardhme më të mirë për fëmijët tanë”, thuhet tutje në postim./teve1.info/
