Ministrja e Arsimit, Arbërie Nagavci, ka reaguar pas dorëzimit të kallëzimit penal ndaj saj në Prokurorinë Speciale në Prishtinë nga disa deputetë të opozitës.
Nagavci e ka vlerësuar të pritshëm këtë veprim por që sipas saj do të hidhet poshtë pasi ka thënë se ende nuk ka përfunduar puna e Komisionit Hetimor.
Ajo po ashtu ka shtuar se partitë opozitare edhe pse u munduan shumë nuk ia dolën që ta rikthejnë sistemin e vjetër në media dhe në Kuvend.
“PDK-LDK-AAK, të bashkuar si gjithnjë, sot paskan dorëzuar kallëzim penal ndaj meje për subvencionimin e nxënësve për tekste dhe materiale shkollore. Shumë e pritshme nga këto subjekte, kur e dimë mirëfilli se cilat grupe interesi kemi prekur. Reagimet nisën që atë ditë kur shkëputëm praktikën 20-vjeçare të blerjeve milionëshe të teksteve shkollore me kontrata njëburimore, të mbushura me hallka dhe mundësi abuzimi. Krijuam një proces transparent të subvencionimit të drejtpërdrejtë, ku çdo formë dhe mundësi abuzimi u eliminua. U përpoqën në çdo mënyrë dhe me çdo mjet, në media dhe në Kuvend, për ta rikthyer sistemin e vjetër, por nuk ia dolën. Së fundi, kanë krijuar Komision Hetimor, të cilin e kemi përkrahur edhe ne si grup parlamentar i Lëvizjes VETËVENDOSJE! dhe unë si ministre e Arsimit, sepse nuk kemi çfarë të fshehim. Megjithatë, pa përfunduar punën aty dhe pa miratuar Raportin e Komisionit Hetimor, i janë drejtuar Prokurorisë Speciale me kallëzim penal. Ky kallëzim penal do të hidhet poshtë, ashtu si edhe i kaluari që u hodh poshtë javën e kaluar. Nga librat duhet të përfitojnë së pari dhe kryesisht nxënësit, jo grupet e interesit. Një gjë është e sigurt, pavarësisht të gjitha tentativave për t’i sprapsur vendimet tona të drejta, NE NUK DO TË NDALEMI”, ka shkruar ajo në Facebook.
Të martën deputetët Bekim Haxhiu, Shemsedin Dreshaj, Vlora Dumoshi, Agim Veliu e Ardian Kastrati, anëtarë të Komisionit Hetimor për Tekstet Shkollore kanë dorëzuar kallëzim penal ndaj ministres së Arsimit, Shkencës dhe Teknologjisë, Arbërie Nagavci, pasi të njëjtit po vlerësojnë se subvencionimi i teksteve shkollore nga MASHT-i ka shkelje ligjore./teve1.info/
