Njoftimi i Ministrisë së Tregtisë se po punojnë për rregullimin e çmimeve të naftës, i vuri në lëvizje.
Shoqata e Naftëtarëve u mblodh të enjten për të diskutuar situatën e fundit.
Pas takimit, ata nxorën një dokument.
Naftëtarët po thonë se qeveria e ka në plan t’ua kufizojë sërish marzhën e fitimit.
Kjo kategori po rekomandon që të ulet akciza e TVSH-ja për produkte të naftës.
Nëse nuk u përfillen kërkesat, ata po paralajmërojnë mbylljen e pikave të derivateve.
E heqje të akcizës dhe TVSH-së për produktet e naftës, të enjten nga Prizreni kërkoi kryetari i PDK-së, Memli Krasniqi.
“Qeveria është duke i rritur të hyrat përmes ngritjes së çmimit dhe pastaj po na e shet neve si sukses në zhvillimin e taksave, por realisht është duke e vështirësuar dhe përkeqësuar mirëqenien dhe jetën e qytetarëve”, tha ai.
E pikërisht për këtë çështje, ka reaguar edhe Lidhja Demokratike e Kosovës.
Madje këta kanë kërkuar debat parlamentar për të propozuar rezolutë për uljen e akcizës së derivateve.
“Grupi parlamentar i LDK-së, do të kërkojmë që në Kuvendin e Kosovës të mbahet një debat parlamentar dhe do të propozojë një rezolutë parlamentare për uljen e akcizës në derivate, si dhe uljen e TVSh-së në produkte esenciale deri në tejkalimin e kësaj krize”, ka thënë ai.
Ndryshe gjatë ditës së djeshme çmimi i litrit të naftës shënoi rekord duke shkuar në 1.82 euro kurse i benzinit në 1.84.
Kronika e realizuar nga gazetari Gojart Jashari.
