Shoqata e Naftëtarëve të Kosovës ka shprehur shqetësim për vazhdimin e masave për kontrollin e çmimeve të produkteve të naftës, duke pretenduar se këto masa po dëmtojnë bizneset, po cenojnë konkurrencën e lirë dhe nuk po sjellin përfitime reale për konsumatorët.
Në një reagim publik, Shoqata ka vlerësuar se vendimi për kontrollin e çmimeve nuk i përmbush kriteret e përcaktuara për tregtinë me produkte të naftës dhe karburante të ripërtëritshme.
Sipas saj, vendimi është gjithashtu në kundërshtim me Udhëzimin Administrativ i cili parasheh që masa të tilla të mund të zbatohen për një periudhë maksimale prej 90 ditësh.
Shoqata ka ngritur shqetësime edhe lidhur me barrën financiare që, sipas saj, po rëndon mbi konsumatorët.
Ajo ka pretenduar se, krahas rritjes së çmimeve në tregun ndërkombëtar, është rritur edhe pagesa që shkon në buxhetin e shtetit.
“Nga data 3 mars 2026 deri më sot, konsumatorët kanë paguar në buxhetin e shtetit mesatarisht rreth 7.5 centë për litër më shumë se në periudhën para fillimit të konfliktit dhe rritjes së çmimeve të furnizimit”, thuhet në reagimin e Shoqatës.
Sipas naftëtarëve, mungesa e politikave mbështetëse dhe e një plani operativ shtetëror për përballimin e krizave energjetike ndërkombëtare ka bërë që barra financiare të vazhdojë të bjerë mbi qytetarët dhe bizneset.
Shoqata ka theksuar se, pavarësisht vështirësive dhe humbjeve financiare, kompanitë e sektorit të naftës kanë vazhduar të sigurojnë furnizim të rregullt dhe të pandërprerë të tregut.
“Karburantet janë produkte me rëndësi jetike për ekonominë, transportin dhe sigurinë kombëtare”, thuhet në reagim.
Në fund, Shoqata e Naftëtarëve të Kosovës i ka kërkuar Ministrisë së Industrisë, Ndërmarrësisë dhe Tregtisë që të anulojë menjëherë vendimin për kontrollin e çmimeve dhe të rikthejë funksionimin e tregut mbi parimet e konkurrencës së lirë.
Shoqata ka paralajmëruar se, nëse vendimi nuk anulohet, do të shqyrtojë të gjitha mundësitë juridike për kundërshtimin e masave, përfshirë edhe kërkesën për kompensim të humbjeve që, sipas saj, janë shkaktuar nga këto masa.
Në të njëjtën kohë, ajo është shprehur e gatshme për dialog institucional dhe ka kërkuar që vendimet e ardhshme për sektorin e naftës të bazohen në analiza profesionale, ligjshmëri, transparencë dhe konsultim të drejtpërdrejtë me përfaqësuesit e industrisë./teve1.info/
