Tenisti i njohur spanjoll Rafael Nadal do të mungojë në turneun Grand Slam “Australian Open” shkaku i një lëndimi të ijëve, raporton “BBC”.
Nadal është kthyer në Spanjë për trajtim të lëndimit që e mori gjatë turneut “Brisbane International”.
37-vjeçari bëri rikthimin e shumëpritur këtë javë, pasi gati një vit jashtë fushës së tenisit. Ai fitoi dy meçet e para në Brisbane, para se të pësonte lëndim në humbjen në çerekfinale kundër Jordan Thompsonit të premten.
Nadal ka thënë se nuk mund të garojë në nivelin maksimal, dhe ka vendosur të heqë dorë nga pjesëmarrja në “Australian Open”.
“Vërtetë kam dashur të luaj në Australi dhe kam pasur mundësinë të luaj disa ndeshje që më kanë bërë të lumtur. Faleminderit të gjithëve për përkrahjen dhe shihemi së shpejti”, ka shkruar Nadal në rrjete sociale.
“Australian Open” fillon më 14 janar.
