Qendra amerikane, Michael Myers është shpallur “MVP” i ndeshjes së dytë finale të play-offit , mes Trepçës e Bashkimit në Superligën e Kosovës në basketboll.
Trepça e mposhti Bashkimin në Mitrovicë për ta barazuar serinë finale në 1:1, ndërsa më i merituari për fitoren e kampiones në fuqi ishte Myers.
Amerikani Myers ishte i pandalshëm në trapez dhe ndeshjen e mbylli me 22 pikë, 9 kërcime e 4 asistime.
Myers është përzgjedhur “MVP” i këtij takimi me votat e publikut, ndërsa në garë për këtë çmim ishin edhe Tekele Cotton e Drilon Hajrizi të Trepçës, si dhe Lejson Zeqiri e Dirk Williams të Bashkimit.
“MVP” i finales së parë, të cilën e fitoi Bashkimi të dielën e shkuar ishte zgjedhur fundori amerikan Wendell Green.
