Lidhur me këtë çështje, Mustafa tha se Partia Guxo nuk ka marrë asnjë vendim apo diçka zyrtare nga KQZ-ja për ndonjë vërejtje.
“Ne sot jemi njoftuar përmes medieve, diçka legale nuk kemi, nuk kemi marrë ndonjë dokumentacion nga Komisioni Qendror Zgjedhor. Ashtu siç e keni parë edhe ju e kemi parë edhe ne, ka qenë një rekomandim i Zyrës Ligjore të Komisionit Qendror, mirëpo një vendim nuk është marrë akoma. Tash do ta shqyrtojë Komisioni Qendror dhe pas vendimit të Komisionit Qendror do të shohim pra hapa tjerë çfarë do t’i marrim edhe ne”, tha ai.
Tutje gjatë emisionit, Mustafa tha se zgjedhja e dy kryetarëve në krye të partisë Guxo është bërë me konsultime të vazhdueshme që kjo parti ka pasur me KQZ-në teksa thekson se anëtarët e KQZ-së kanë marrë pjesë edhe në Kuvendin Zgjedhor të saj.
“Para Kuvendit Zgjedhor ne kemi pasur konsultime të vazhdueshme me zyrtarë të KQZ-së të cilët na kanë njoftuar që nuk do të ketë probleme me zgjedhjen e dy kryetarëve, edhe vetë anëtarët e KQZ-së kanë qenë prezentë në Kuvendin Zgjedhor të cilin e kemi mbajtur më 7 shtator, gjithçka ka shkuar në rregull mirëpo siç duhet kjo po e pengon dikë, po e pengon edhe skenën politike”, u shpreh Mustafa.
Zëdhënësi i Komisionit Qendror të Zgjedhjeve, Valmir Elezi ka thënë sot për Tëvë1 se Zyra për Regjistrim të Partive Politike dhe Certifikim i ka renditur disa gjetje në raport me Ligjin për Zgjedhjet e Përgjithshme dhe Rregullën Zgjedhore 01/2013 për regjistrimin e partive politike.
Ndërkohë, Partia Guxo më 7 shtator e ka mbajtur Kuvendin e Parë Zgjedhor dhe në këtë kuvend kjo parti ka zgjedhur dy kryetarë, Donika Gërvallën dhe Faton Pecin.
Partia Guxo duket se do të shkojë sërish në një kuvend të brendshëm zgjedhor për zgjedhjen e kryetarit të saj, kjo pasi që kuvendi i Partisë Guxo, dyshohet se ka përfunduar jashtë rregullave që përcaktohen në rregulloret e brendshme të KQZ-së, konkretisht të Zyrës për Regjistrimin dhe Certifikimin e Partive Politike./Teve1.info/
