Deputeti i Lidhjes Demokratike të Kosovës, Besian Mustafa, ka deklaruar se, ndonëse është miratuar përfshirja e buxhetit të Prishtinës në Ligjin për Buxhetin 2026, beteja me pushtetin qendror vazhdon. Ai theksoi se ende ekzistojnë përpjekje për të sabotuar zhvillimin e kryeqytetit.
Në një konferencë për media pas përfshirjes së buxhetit të Prishtinës në projektligj nga Komisioni për Buxhet, Mustafa e ka cilësuar si shqetësuese se projektet e rëndësishme për jetën e qytetarëve të Prishtinës vazhdojnë të mbeten jashtë buxhetit.
“Ne nuk lejuam që Prishtina të mbetej në harresë për shkak të bllokadave politike. Sidoqoftë, beteja vazhdon, pasi ende po përpiqen ta sabotojnë zhvillimin e kryeqytetit dhe qytetarët e tij. Është alarmante që projektet që kanë ndikim të drejtpërdrejtë në jetën e qytetarëve mbeten të papërfshira në buxhet. Unaza e kryeqytetit është ende e bllokuar, Spitali i kryeqytetit është lënë në harresë, dhe shumë projekte të tjera jetike nuk janë financuar. Pushteti qendror vazhdon të pengojë zhvillimin e Prishtinës”, tha Mustafa.
Sipas tij, përplasjet rreth buxhetit të Prishtinës kanë nisur që në vitin 2023, kur Ministria e Financave kishte filluar të bllokonte buxhetin komunal./teve1.info/
