Ish kryeministri i Kosovës, Isa Mustafa ka shprehur përkrahje për protestën e OVL-UÇK e cila do të mbahet ndaj procesit gjyqësor nga Dhomat e Specializuara në Hagë.
Mustafa përmes Facebook tha se të gjithë qytetarët e Kosovës duhet të mbrojnë vlerat e luftës duke mos lejuar të rishkruhet historia, transmeton KosovaPress.
Tutje, ai thotë se lufta e UÇK-së dhe rezistenca politike e Rugovës janë gurëthemelet e shtetësisë së Kosovës.
“Është detyrë e gjithë neve të mbrojmë vlerat e luftës, dhe të mos lejojmë të rishkruhet historia me dëshmi të instrumenteve të pushtetit serb që ushtroi dhunë, represion dhe gjenocid në Kosovë. Shteti i Kosovës është rezultat i rezistencës politike të drejtuar nga Presidenti Rugova dhe i luftës së UÇK-së. Është vlerë e përbashkët”, tha ai.
Mustafa tha se themelimi i Dhomave të Specializuara është bërë në besim në drejtësinë ndërkombëtare, prej të cilës Kuvendi i Kosovës edhe e miratoi atë.
Ai thotë se këtë besim e ka ndarë bashkë me ish presidentin, Hashim Thaçi dhe me ish kryeparlamentarin, Kadri Veseli.
“Ne kemi pasur besim në drejtësinë ndërkombëtare kur Kuvendi i Kosovës votoi themelimin e Dhomave të Specializuara në Hagë me ligje të Kosovës. Jam dëshmitar se këtë besim të plotë e kanë pasur edhe Presidenti Thaçi dhe Kryeparlamentari Veseli, me të cilët kam punuar asokohe. Gjykata u themelua me bindje se do të marrin dënimet e merituara njerëzit për të cilët faktohet se kanë kryer krime”, thotë ndër të tjerash Mustafa.
Mustafa potencoi se përkrahja e tij do të jetë nga larg, duke nënvizuar se nëse shëndeti do ia lejonte do të ishte pjesëmarrës në protestë.
“Me Thaçin, Veselin, Krasniqin, Selimin, kemi qenë kundërshtarë politik. Kemi garuar se kush e bënë Kosovën më mirë. Por, në këtë rast, sikur ta kisha shëndetin, me 7 gusht do të isha edhe unë në Shesh”, tha ai.
OVL-UÇK-ja dhe organizatat e tjera të dala nga lufta nesër nga ora 17:00, do të protestojnë në sheshin “Skënderbeu” në Prishtinë, për të kundërshtuar vijueshmërinë e procesit gjyqësor në Hagë, ndaj ish-krerëve të UÇK-së.
Gjatë protestës do të kërkohet reagim institucional lidhur me këtë proces.
