Deputeti i Lidhjes Demokratike të Kosovës, Besian Mustafa u ka bërë thirrje Lëvizjes Vetëvendosje dhe Partisë Demokratike të Kosovës që të bashkëpunojnë për të zgjidhur çështjen e presidentit.
Përmes një deklarimi publik, Mustafa ka propozuar që të dy partitë të dalin me tre emra të përbashkët për kandidat për president, të cilët sipas tij duhet të jenë figura jashtë skenës aktuale politike.
Ai ka theksuar se një marrëveshje e tillë do të mundësonte zgjedhjen e Presidentit me lehtësi në Kuvend, duke përmendur edhe numrat e nevojshëm të votave.
“Unë i ftoj LVV-në dhe PDK-në që së bashku të propozojnë 3 emra për President, kandidatë jashtë skenës aktuale politike. Së bashku do ta zgjidhnin Presidentin me lehtësi me 88 vota (LVV 66 + PDK 22). Për shkak të afateve kushtetuese, i pres deri nesër në mesnatë”, ka deklaruar Mustafa.
