Studiuesi i filozofisë politike, Latif Mustafa, ka komentuar zhvillimet e fundit brenda Lidhjes Demokratike të Kosovës, pas mbledhjes së Grupit Parlamentar të kësaj partie.
Në emisionin “Këndi i Debatit” në Tëvë1, Mustafa ka folur për qëndrimin e gjashtë deputetëve të LDK-së, të cilët kanë deklaruar se nuk do ta mbështesin kandidaturën e Bekim Sejdiut për president të Kosovës.
Kryetari i LDK-së, Lumir Abdixhiku, pas mbledhjes së Grupit Parlamentar kishte bërë të ditur se bëhet fjalë për Hykmete Bajramin, Avdullah Hotin, Arben Gashin, Armend Zemajn, Kujtim Shalën dhe Janina Ymerin.
Sipas Mustafës, nëse vendi shkon në zgjedhje të reja, këta deputetë nuk do të duhej të përfshiheshin në listën zgjedhore të LDK-së.
“Etapa e fundit është se Lumir Abdixhiku, sa herë po flasim për zgjedhjet në Kosovë, domosdoshmërisht po na lidhet diskutimi me LDK-në. Edhe në këtë fazë, unë mendoj që LDK-ja ka hyrë në një etapë të ridefinimit të vërtetë, ku Lumir Abdixhiku duhet të veprojë në bazë të statutit të partisë, që parasheh përjashtimin e këtyre personave nga partia”, ka thënë Mustafa.
Megjithatë, ai sqaroi se nuk e sheh domosdoshmërisht si të nevojshëm një përjashtim teknik nga partia, por më shumë si çështje të përfaqësimit të tyre në zgjedhjet e ardhshme.
“Unë nuk mendoj për një përjashtim teknikisht, por që nëse shkon vendi në zgjedhje, këta njerëz nuk do të duhej të futen në listë për deputetë në LDK”, është shprehur ai.
Mustafa ka thënë se zhvillimet e fundit do të jenë një test edhe për lidershipin e Abdixhikut dhe mënyrën se si ai do ta zbatojë vendimin e organeve të partisë.
“Këtu Abdixhiku do të jetë lideri i fundit, se a është ai lideri i partisë edhe ai që ushtron me statutin e partisë, meqë Kryesia e dha një vendim. Tash duhet të definohet edhe të bëhen të qarta blloqet”, ka deklaruar Mustafa.
Sipas tij, situata e krijuar mund të çojë drejt një riformatimi të brendshëm të LDK-së dhe qartësimit të qëndrimeve brenda partisë.
