Kandidati për deputet nga radhët e Partisë Demokratike të Kosovës, Arben Mustafa, ka thënë se mosarritja e një koalicioni me Nismën Socialdemokrate nuk duhet parë si një problem i brendshëm i PDK-së.
Në emisionin “Këndi i Debatit”, Mustafa ka theksuar se nuk ka pasur negociata formale mes kreut të Nismës Socialdemokrate, Fatmir Limajt dhe PDK-së.
“Sa i përket Limajt, ka pasur një tendencë ta pasqyrojnë këtë situatë si një problem të brendshëm të PDK-së. Limaj ka 12 vite që nuk është pjesë e PDK-së dhe ka një parti e cila vepron plotësisht e pavarur nga PDK-ja. Kjo nuk është problem i brendshëm për ne. Ka pasur diskutime për një koalicion të mundshëm që nuk ka ndodhur. Madje, më shumë është folur për një koalicion të Limajt me LDK-në para se të përmendej ndonjë bashkëpunim me PDK-në. Nisma është parti e vet dhe nuk është pjesë e PDK-së.Nuk ka pasur një proces formal të negociatave. Ka ndodhur thjesht një ndarje e Limajt nga PDK-ja 12 vite më parë dhe rrugët e tyre janë të ndara. Ka pasur diskutime të jashtme për një koalicion të mundshëm që nuk ka ndodhur, sepse nuk ka pasur kushte të përshtatshme për negociata formale, sidomos për shkak të afatit të shkurtër. Limaj ka qenë i përfolur për një koalicion me LDK-në, i cili ishte i pritshëm, por nuk ndodhi. Ditët e fundit para mbylljes së listave, filloi të diskutohej për një koalicion të mundshëm me PDK-në, që gjithashtu nuk u realizua”, ka deklaruar ai.
Ai ka shtuar se kryetari i PDK-së, Bedri Hamza, ka theksuar se pas zgjedhjeve do të jetë i hapur për bashkëpunim me të gjitha partitë që do të jenë pjesë e Parlamentit të Kosovës.
“Këtu nuk bëjmë përjashtim ndaj Nismës. Nëse e kalojnë pragun, absolutisht do të jenë partner i mundshëm për PDK-në”, ka thënë ai./teve1.info/
