Mustafa përmes një postimi në Facebook, tha se Ligji ia lejon MF-së që të procesojë pagat deri më 5 tetor në rast se ka nevojë që t’i sigurojë mjetet.
Ndërkohë, ai thotë se vet ministri Murati e ka konfirmuar se në llogari bankare të MF-së janë mbi 800 milionë euro.
“Sot, Ministria e Financave nuk ka procesuar pagat për asnjë nga mbi 80.000 zyrtarët publik! Pra, as për mjekët, as policët, as zjarrfikësit, as ushtarët e FSK… askujt! Ligji ia lejon Ministrisë të procesojë pagat deri më 5 tetor, në rast se ka nevojë të sigurojë mjetet. Por, MF ka 800 milionë euro në llogari bankare, të konfirmuara nga vet ministri. E në anën tjetër qytetarët po përballen me një nga krizat më të thella ekonomike dhe energjetike dhe me rritje të frikshme të çmimeve! Si t’i paguajnë këta qytetarë faturat e energjisë, ujit, telefonit, këstet e kredive kur Qeveria nuk ua proceson pagat?!”, ka shkruar Mustafa.
Sipas tij, mos procedimi i pagave sot, duket qartë se është ndëshkim i gjithë zyrtarëve publik.
“Pse pra nuk janë procesuar pagat sot? Ky duket qartë se është ndëshkim i të gjithë zyrtarëve publik, është presion i llojit “detyroni mësuesit të kthehen në shkolla, përndryshe as juve nuk ua procesojmë pagat”. Qeveria ta ndalë urgjentisht këtë qasje të ndëshkimit kolektiv dhe të mos dëmtojë edhe më tej gjendjen e rënduar ekonomike të qytetarëve tanë!”, ka thënë më tej Mustafa. /teve1.info/
