Ish-kryeministri i Kosovës, Isa Mustafa ka kritikuar kryeministrin, Albin Kurti për pranimin e planit franko-gjerman dhe presidenten, Vjosa Osmanin për mbështetjen që i ka dhënë kësaj ujdie.
Sipas Mustafës, ky plan u jep të drejta kolektive të vet-menaxhimit të serbëve në Kosovë, e që ai thotë se kjo nënkupton kompetenca ekzekutive.
Mustafa i ka kërkuar presidentes Vjosa Osmani që të tregojë nëse ky nen është në përputhje me Kushtetutën
“Marrëveshja bazë e pranuar nga Kryeministri Kurti në pikën 7 parasheh një formë të vet-menaxhimit për serbet në Kosovë, sipas përvojave evropiane. Le të tregojë Presidentja Osmani, që vet-shitet si juriste e fortë se a është kjo në harmoni me Kushtetutën; a parasheh Kushtetuta e Kosovës të drejta asimetrike për komunitetet, që serbet të kenë të drejta kolektive të vet-menaxhimit, kurse komunitetet e tjera jo? Menaxhimi përfshin planifikimin, organizimin, personelin, drejtimin (udhëheqjen) dhe kontrollin. Pra kompetenca ekzekutive. Këto i pranoi kryeministri ynë. Asociacioni është diçka tjetër”, ka shkruar Mustafa.
