Ish-komandanti i UÇK-së dhe anëtari i PDK-së, Rrustem Mustafa, ka propozuar një marrëveshje të gjerë politike ndërmjet Lëvizjes Vetëvendosje, PDK-së dhe partive të tjera politike.
Mustafa ka thënë se, në situatën aktuale, Kosovës i nevojitet unitet politik, qartësi dhe një drejtim i përbashkët shtetëror.
Për këtë, ai ka bërë thirrje për hapjen e dialogut ndërmjet forcave politike, duke theksuar se një marrëveshje e tillë duhet të mbështetet në interesat themelore të Republikës së Kosovës.
“Besoj se Kosovës i duhet një marrëveshje e gjerë politike, e cila do të ndërtohej mbi interesat themelore të Republikës, me unitet, qartësi dhe një drejtim të përbashkët shtetëror”, ka deklaruar Mustafa.
Sipas tij, ky angazhim duhet të mbështetet në tri shtylla kryesore.
Shtylla e parë, sipas Mustafës, është uniteti politik dhe qetësimi i brendshëm, përmes bashkërendimit të forcave politike dhe shoqërisë civile rreth interesit shtetëror.
Shtylla e dytë është mbështetja juridike, ku ai ka kërkuar forcimin e ekipeve mbrojtëse dhe sigurimin e mbështetjes së nevojshme juridike për proceset e mëtejshme.
Ndërsa shtylla e tretë, sipas tij, është angazhimi diplomatik, me veprim të koordinuar në arenën ndërkombëtare për të paraqitur historinë e Kosovës dhe të UÇK-së dhe për të avancuar interesat e Republikës.
Mustafa ka theksuar gjithashtu rëndësinë e partneritetit strategjik të Kosovës me Shtetet e Bashkuara të Amerikës dhe vendet perëndimore.
Në fund, ai ka bërë thirrje për organizimin e një tryeze të përbashkët politike ku do të merrnin pjesë Vetëvendosje, PDK-ja dhe partitë e tjera.
Sipas Mustafës, një takim i tillë do të mundësonte diskutimin e një marrëveshjeje politike me objektiva të qarta dhe një drejtim të përbashkët për Kosovën.
