Elon Musk ka dhënë dorëheqjen nga roli i tij si këshilltar i lartë i Presidentit Donald Trump, duke mbyllur një periudhë të trazuar në Uashington ku ai drejtoi përpjekjet për të reformuar burokracinë federale dhe për të ulur shpenzimet qeveritare.
Largimi i tij u bë publik të mërkurën në mbrëmje përmes një postimi në rrjetin e tij social X, shkruan AP.
“Ndërsa koha ime e planifikuar si Punonjës i Posaçëm Qeveritar po mbaron, dua të falënderoj Presidentin Donald Trump për mundësinë për të ulur shpenzimet e panevojshme,” shkroi Musk në platformën X.
“Misioni DOGE vetëm sa do të forcohet me kalimin e kohës, ndërsa do të bëhet një mënyrë jetese në të gjithë qeverinë.”
Musk kishte marrë përsipër drejtimin e Departamentit të Efikasitetit të Qeverisë (DOGE), një nismë e re e administratës Trump për të përmirësuar funksionimin e agjencive federale.
Përpjekjet e tij përfshinë propozime për mijëra shkurtime vendesh pune, shpërbërjen e disa agjencive dhe një reduktim të ndjeshëm të shpenzimeve federale.
Megjithatë, shumë nga synimet e tij ambicioze nuk u realizuan. Objektivi fillestar për të shkurtuar 2 trilion dollarë në shpenzime u zvogëlua gradualisht në 150 miliardë dollarë, pas përballjes me rezistencë të fortë brenda administratës dhe në Kongres.
Musk, i njohur për qasjen e tij joortodokse dhe për stilin drejtues agresiv, shpesh u përplas me zyrtarë të tjerë të lartë të administratës, të cilët shprehën shqetësime për ndërhyrjet e tij në funksionimin e departamenteve të tyre.
Po ashtu, përpjekjet e tij nxitën një reagim të fortë politik dhe çuan në një sërë padish.
Dorëheqja e tij erdhi një ditë pasi CBS publikoi një pjesë të një interviste me Musk, ku ai kritikoi një nga nismat kryesore të Trump – të cilën presidenti e ka quajtur “projektligji i tij i madh dhe i bukur”.
Në intervistë, Musk shprehu zhgënjimin e tij për përmbajtjen dhe ndikimin e asaj nisme legjislative.
Roli i Musk në administratën Trump ishte menduar të ishte i përkohshëm, dhe ai së fundmi kishte sinjalizuar se do t’i rikthehej fokusit tek kompanitë e tij: Tesla, SpaceX dhe nismat e reja në inteligjencën artificiale dhe neuroteknologji.
