Anëtari i Këshillit të Përgjithshëm të Lidhjes Demokratike të Kosovës, Valon Murtezaj ka shprehur indinjatën e tij për siç ka thënë ‘medodat e punës të instaluara në majën e vendim-marrjes në këtë subjekt politik’.
Sipas tij, prezantimi i paralajmëruar për nesër i një agjende lidhur me një orientim qeverisës, pa asnjë konsultim, dhe pa asnjë miratim të organeve statutare partiake shënon pikën më të ulët të demokracisë në LDK.
“Një orientim i tillë politik për Republikën e Kosovës duhet të ndërtohet përmes konsultimeve të gjëra. Në aspektin statutar, kjo është përgjegjësi dhe kompetencë vetëm e Këshillit të Përgjithshëm të Lidhjes Demokratike të Kosovës. Sa është serioze kjo performancë tregojnë emërtimet ad-hoc të përdorura brenda një periudhe të shkurtër: Qeveri Nacionale e Tranzicionit, Qeveria Nacionale Kalimtare, Qeveri Gjithpërfshirëse Kalimtare, Qeveri Gjithpërfshirëse e Unitetit, Qeveri e Unitetit dhe Qeveri e Unitetit Kombëtar”, ka shkruar ai në Facebook.
Murtezaj ka shtuar se LDK-ja e Ibrahim Rugovës nuk duhet ta braktisë demokracinë pasi për të kjo gjë është e pafalshme dhe e dëmshme për LDK-në dhe për Kosovën.
“LDK-ja e Ibrahim Rugovës, e demokracisë së parë në këtë rajon, e heronjve të lirisë, e heronjve të demokracisë, e patriotëve për Kosovën, nuk duhet ta braktisë demokracinë. Është e pafalshme, është e dëmshme, për LDK-në, dhe për Kosovën. Partia politike nuk është kompani ndërtimore. Partia politike është organizatë shtet-ndërtimore. Autokracia dhe oligarkia në LDK nuk kanë vend dhe nuk do të kenë. Për demokraci gjithmonë”, ka përfunduar Murtezaj postimin e tij.
Ndryshe, deputetja e Lidhjes Demokratike të Kosovës, Jehona Lushaku-Sadriu, ka bërë të ditur se të enjten ky subjekt do të prezantojë një plan prej 15 pikash lidhur me qeverinë e tranzicionit.
“Sa i përket qeverisë gjithëpërfshirëse nesër LDK-ja do të shpalos një plan prej 15 pikash, ku do të elaborohen pika të këtij plani qeverisës”, ka thënë ajo.
Lushaku-Sadriu: LDK-ja nesër shpalos idenë e Qeverisë së Trancizionit
