Sulmuesi i Kombëtares së Kosovës, Vedat Muriqi do t’i mungoj skuadrës së Mallorcas në duelin kundër Osasunas.
Mungesën e Muriqit në këtë duel të xhiros së 36-t të La Ligas, e ka konfirmuar edhe trajneri i Mallorcas, Javier Aguirre. Trajneri Aguirre ka pranuar se mungesa e Muriqit do të ndihet te Mallorca, duke shtuar se sulmuesi nuk do të jetë në gjendje ta ndihmoj ekipit për shkak të suspendimit. “Do të kemi ndryshime taktike për këtë ndeshje. Mungesa e Muriqit do të ndikoj shumë sepse ai ishte duke e përfunduar sezonin mirë. Shënoi gol kundër Cadizit dhe po rikthente formën fizike, por për fat të keq u ndëshkua me karton në ndeshjen e fundit dhe do të mungoj ndaj Osasunas”, ka thënë Aguirre.
Muriqi në ndeshjen e fundit ndaj Las Palmasit, të cilën Mallorca e fitoi me rezultatin 1:0 u ndëshkua me karton të verdhë. 30-vjeçari ka shënuar 6 gola këtë edicion në kampionatin spanjoll, ndërsa Mallorca po lufton për ta siguruar mbijetesën. Dueli mes Osasunas dhe Mallorcas, zhvillohet sot prej orës 19:30 dhe është i rëndësishëm për të dy ekipet. Kur kanë mbetur edhe tri xhiro deri në fund të edicionit, Mallorca është e 15-ta me 35 pikë, pesë më pak se Osasuna.
