Sulmuesi i Kosovës, Vedat Muriqi duket se është plotësisht gati dhe në formë për sezonin e ri në La Liga të Spanjës, i cili nis pas dy javësh.
Muriqi edhe në sezonin e ri, do të jetë lider i sulmit të Mallorcas pasi një gjë të tillë e ka konfirmuar në fazën përgatitore, saktësisht ndeshjet kontrolluese të ekipit spanjoll.
Në miqësoren e fundit, të cilën Mallorca e fitoi me rezultatin 5:0, Muriqi ka kontribuar me dy gola.
Në fakt, Muriqi ka realizuar tri gola në katër ndeshje kontrolluese dhe pritet të jenë “arma” kryesore e Mallorcas në sezonin e ri.
Ndeshjen e parë në sezonin e ri, Mallorca e luan kundër Real Madridit më 18 gusht, ndërsa deri atëherë Mallorca do t’i luaj edhe tri ndeshje kontrolluese.
Për Muriqin, ky do të jetë sezoni i katërt në Spanjë dhe shpresat e Mallorcas për të siguruar mbijetesën janë pikërisht te sulmuesi 30-vjeçar i Kosovës.
Sezonin e shkuar, Muriqi realizoi 7 gola dhe bëri 2 asistime kurse me Mallorcan ka kontratë deri në verën e vitit 2027.
