Ministri në detyrë i Financave, Hekuran Murati, ka njoftuar se afati për aplikim në kuadër të Pakos së Përballjes me Inflacion për studentët dhe punëtorët e sektorit jo-publik mbetet i hapur edhe gjatë ditës së nesërme.
Ai u ka bërë thirrje të gjithë përfituesve potencialë që ende nuk kanë aplikuar, ta shfrytëzojnë afatin e mbetur dhe të sigurohen që të dhënat e paraqitura në aplikim të jenë të sakta, në mënyrë që procesimi i kërkesave të realizohet pa probleme.
Sipas Muratit, studentët mund të aplikojnë përmes platformës eKosova, njësoj si në thirrjet e mëparshme, ndërsa punëtorët e sektorit jo-publik mund të dorëzojnë aplikimet e tyre përmes formularit të publikuar në faqen e Administrata Tatimore e Kosovës.
Institucionet u kanë bërë thirrje qytetarëve që të mos e lënë aplikimin për momentin e fundit dhe të verifikojnë me kujdes të gjitha të dhënat para dorëzimit të kërkesës./teve1.info/
