Ministri në detyrë i Financave, Hekuran Murati u ka bërë thirrje deputetëve të Kuvendit të Kosovës që të miratojnë buxhetin e vitit 2025 për Komunat e Prishtinës, Gjilanit dhe Zubin Potokut.
Ai theksoi se tani që Kuvendi është i konstituuar, është koha që deputetët të veprojnë dhe të krijojnë mundësinë për pagesën e faturave të grumbulluara që janë shkaktuar për shkak të mungesës së buxhetit.
“Qeveria e Kosovës, dje, ia ka dërguar Kuvendit materialin buxhetor për këto tri komuna, pasi ato nuk kishin arritur ta miratojnë buxhetin në afatin ligjor. Përmes procedurës së përshpejtuar prej 72 orësh, Kuvendi mund të miratojë buxhetet për këto komuna dhe të mundësojë pagesën e detyrimeve financiare që janë grumbulluar që nga java e ardhshme”, thuhet në postimin e Muratit.
Murati bëri thirrje për deputetët e opozitës që të lënë mënjanë dallimet politike dhe të bëjnë veprimin e duhur, duke themeluar komisionet parlamentare dhe duke votuar për buxhetet e këtyre komunave.
Ai theksoi se miratimi i buxhetit është një hap i domosdoshëm për zgjidhjen e krizës financiare që këto komuna po përballen dhe për mbështetje të qytetarëve të tyre./teve1.info/
