Kryetari i Lëvizjes për Bashkim, Valon Murati, ka thënë se në çdo marrëveshje që Kosova e ka bërë në raport me Serbisë ka humbur diçka, por njëkohësisht edhe ka fituar.
Sipas tij, çdoherë është dashur që të ketë lëshime në raport me pozicionin dhe ndikimin e serbëve.
“Në çdo marrëveshje që Kosova e ka bërë me Serbinë prej 2011-tës, diçka ka humbur e diçka ka fituar. Kryesisht ka fituar pak diçka në sovranitetin e jashtëm dhe çdoherë ka humbur diçka brenda. Sepse është dashur që gjatë gjithë kohës të lëshosh diçka brenda në raport me serbët, në raport me pozicionin e tyre, me ndikimin e serbëve brenda, për të fituar ‘pak’ nga sovraniteti i jashtëm. Kështu, pra ka ecur çështja prej atëherë e deri më sot”, tha ai në emisionin “Këndi i Debatit” në Tëvë1.
Ai thotë se plani evropian nuk synon ta zgjidhë problemin tërësisht me Serbisë.
“Ironia është që as kjo marrëveshje nuk synon me zgjidh tërësisht problemin edhe e thotë (marrëveshja), kush e lexon, këtu nuk fshihet asgjë. Pika e 6, thotë që do të vazhdojnë bisedimet nën fasilitimin e Bashkimit Evropian që të arrihet pastaj dikur edhe një marrëveshje finale e ligjshme për të dyja palët”, tha ai.
Murati thotë që nuk e ka të qartë se a do të ratifikohet marrëveshja nga kuvendet.
“Kështu siç është, unë nuk e kam të qartë se a do të futet në Kuvend, a do të futet në Kuvendin e Serbisë, marrëveshja a do të ratifikohet? Marrëveshja e vitit 2013 nuk është ratifikuar në Kuvendin e Serbisë”, u shpreh ai.
Që nga viti 2011, Kosova dhe Serbia zhvillojnë negociata për arritjen e normalizimit të plotë të raporteve nën ndërmjetësimin e BE-së. Për planin evropian kryeministri Kurti dhe presidenti Vuçiq pritet të diskutojnë më 18 mars në Ohër të Maqedonisë së Veriut.
