Ministri në detyrë i Financave, Hekuran Murati ka paralajmëruar se raporti për verifikimin e mandateve dhe kuorumit mund të mos votohet as sot.
Sipas tij një çështje për të cilën Kuvendi ka vendimmarrje, nuk mund të hidhet në rivotim.
“Votimi është konsumuar”, ka shkruar ai në rrjetin social Facebook.
Tutje Murati ka thënë se në rivotim çështja hidhet vetëm nëse herën e parë nuk ka pasur kuorum për vendimmarrje, ‘siç ka qenë rasti në vitin 2014, me vetëm 44 deputetë që kanë marrë pjesë në votim herën e parë’.
Pas këtij vendimi të opozitës, ai ka thënë se vendimmarrja në Kuvend gjendet e bllokuar para një muri të pakapërcyeshëm dhe sipas tij deputetët s’mund të japin betimin, sepse kanë refuzuar verifikimin e mandateve të veta.
Ai ka shtuar se me veprimin e tyre opozita ka refuzuar mandatin dhe se procesi duhet të kthehet në pikën zero ‘pra një proces i ri zgjedhor i cili prodhon një legjislaturë të re’.
“Një refuzim i tillë sikurse ky i partive të opozitës, nuk ka ndodhur asnjëherë. Praktikisht, kjo i bie se deputetët kanë refuzuar mandatin, dhe procesi duhet të kthehet në pikën zero – pra një proces i ri zgjedhor i cili prodhon një legjislaturë të re e cila, ka sensin që të pranojë mandatin e dhënë nga populli”, ka shtuar ai.
Megjithatë, për Muratin e vetmja rrugë tjetër për të evituar skenarin e zgjedhjeve të reja, është një dakordim unanim politik, ku vetëm deputetët që kanë refuzuar mandatin me votën e tyre, tërhiqen dhe ua lëshojnë vendin e tyre kolegëve tjerë nga i njëjti subjekt.
“Një gjë e ngjashme kishtë ndodhur në legjislaturën që lamë pas me deputetët e Listës Serbe”, ka shkruar në fund Murati./teve1/
