Ministria i Finacave, Hekuran Murati ka reaguar pas deklaratës së drejtorit të Asociacionit të Komunave të Kosovës, Sazan Ibrahimi dhe kryetarit të Suharekës, Bali Muharremaj se Qeveria, ka mbyllë llogarinë bankare të Komunës së Suharekës.
Murati këtë e ka quajtur dezinformatë, duke thënë se Qeveria nuk mbyll llogari bankare të komunave, por përmbaruesit dhe vendimet e prera gjyqësore.
“Dezinformatat nuk kalojnë!Kushdo që pretendon se Qeveria bllokon llogari të komunave, gënjen. Qeveria nuk bllokon llogari, e aq më pak komunave. Llogaritë bllokohen nga përmbaruesit dhe vendimet e prera gjyqësore”, ka shkruar ai.
Drejtori ekzekutiv i Asociacionit të Komunave të Kosovës, Sazan Ibrahimi ka njoftuar se Komunës së Suharekës i është bllokuar xhirollogaria bankare nga Qeveria e Kosovës si pasojë e kontratës kolektive.
Ai i ka bërë thirrje Qeverisë që t’i dëgjojë kërkesat e komunave për kontratën kolektive.
“Qeveria ia bllokoi Komunës së Suharekës xhirollogarinë bankare si pasojë e kontratës kolektive dhe mosgatishmërisë se qeverisë për ta zgjidhur këtë problem. Kjo mund t’i ndodh edhe komunave tjera nëse qeveria nuk ka vullnet për të gjetur zgjidhje të këtij problemi. AKK edhe njëherë kërkon nga qeveria që t’i dëgjojë komunat dhe të reflektojë në kërkesat e tyre për kontratën kolektive”, ka njoftuar Ibrahimi.
Për këtë ka reaguar edhe kryetari i Suharekës, Bali Muharremaj, duke thënë se kjo është bërë për shkak të kontratës kolektive.
Ai ka thënë se kjo do të ketë pasoja për komunën, ndërsa ka kërkuar që më këtë çështje të merret urgjent edhe Kuvendi i Kosovës.
“Ky bllokim ka ndodhur si pasojë e kontratës kolektive. Kjo situatë siç është paralajmëruar edhe nga Asociacioni i Komunave, do të vazhdoj edhe në komunat tjera, nëse nuk merren masa të menjëhershme, si pasojë e kontratës kolektive. Ne kemi obligime financiare për projektet që i kemi planifikuar, dhe nuk duhet të mbesim peng i një marrëveshje të cilën duhet t’a zbatoj Qeveria e Kosovës, e ku pasojat tashmë po i bartim ne si komuna. Për këtë situatë, duhet të veproj urgjentisht edhe Kuvendi i Republikës së Kosovës ngase situata e vështirë financiare do të rëndohet edhe më shumë”, ka shkruar Muharremaj.
