Gjatë seancës që po mbahet në Kuvend, Murati foli për konkursin e KEK-ut, konkurs për të cilin ditëve të fundit pati reagime të shumta në vend duke u raportuar se janë punësuar militantë të Lëvizjes Vetëvendosje, shkruan teve1.info
Ai theksoi e kjo çështje nuk ka fare të bëj me LVV-në por vetëm po gjenden arsye që të akuzohet qeverisja.
Ministri Murati poashtu shtoi se që 20 vjet nuk ka pasur konkurs në KEK, pasi që aty njerëzit janë punësuar vetëm me lista.
“Ndërsa, sa i përket konkursit të fundit në KEK që u bë çështje e madhe dhe temë diskutimi dhe po mundohen që disi ta lidhin me Lëvizjen Vetëvendosje dhe t’ua faturojnë ka një dallim substancial. Fillimisht, kjo fare s’ka të bëj me Lëvizjen Vetëvendosje, por normalisht që s’ka kur të kapet tjetër kund dhe të akuzohet qeverisja. Pastaj shihen dhe gjenden tre veta, që mund të kenë postuar një foto si mbështetës të Lëvizjes, nga 100 e sa që janë pranuar, dhe me këtë t’i ngjitet tiketa që këtu paska pas diçka Qeveria apo Lëvizja Vetëvendosje. Vetëm për me krahasu, po i pyes qytetarët tash, se ju e di që nuk përgjigjeni drejt. A keni dëgju ndonjëherë në 20 vjetët e fundit që u shpall ndonjë konkurs në KEK, Telekom, në Postë apo kudo tjetër?! Unë s’kom dëgju kurrë, se mijëra të punësuar janë punësu me lista. U dërgu lista edhe janë puënsuar njerëzit aty. S’ka pas as konkurs, çka jeni tu fol?!”, tha Murati.
Murati gjithashtu iu drejtua opozitës edhe duke iu thënë “të mos bëjnë hajgare tash”, pasi sipas tij, në të kaluarën kur ata kanë qenë në pushtet, bordet janë ndarë me marrëveshje.
“Tash ka konkurs për herë të parë, ka konkurs, është proces, është procesi ankimor, kushdo që ka ankesa, i inkurajojmë si Qeveri, jemi të interesuar që çdokush me pas të drejtën me pas një punë të dinjitetshme dhe me ju mbrojt e drejta. Mirëpo jo me kësi manipulime qe fajësohet Qeveria. Vetëm sa për me nxjerr prapë një krahasim, kur keni qenë ju në pushtet edhe bordet i keni nda me marrëveshje. Mos bëni hajgare tash”, tha ministri Murati. /Teve1.info/
