Ministri i Financave, Punës dhe Transfereve, Hekuran Murati po qëndron në SHBA, ku është mirëpritur në takim nga Ndihmës Sekretari i Departamentit të Thesarit në SHBA, Larry McDonald.
Ai në Facebook tha se gjatë këtij takimi ka njoftuar ndihmës sekretarin për masat e ndërmarra për ringjalljen ekonomike të vendit, dhe sipas tij, McDonald përgëzoi punën dhe arritjet e deritanishme.
“Gjatë takimit e njoftova për menaxhimin e suksesshëm të pandemisë në Kosovë dhe masat e ndërmarra për ringjalljen ekonomike të vendit, që kanë rezultuar me rritje ekonomike prej 10.53%. Z. McDonald na përgëzoi për punën dhe arritjet e deritanishme, duke vënë theksin edhe te Bonot e Diasporës si një mundësi e mirë për orientim të investimeve nga mërgata drejt projekteve zhvillimore”|, shkroi Murati.
Tutje ai tha se gjatë takimit është folur edhe për planet për ngritje të kapaciteteve në kuadër të reformave, që sipas tij si Qeveri kërkojnë mbështetjen e partnerëve.
“Gjatë takimit, z. McDonald e njoftova edhe për planet tona për ngritjen e kapaciteteve në kuadër të reformave që parashohim si qeveri, gjë për të cilën na duhet edhe mbështetja e partnerëve dhe miqve tanë. Takimin e përmbyllëm me diskutimet për thellim të bashkëpunimit dhe me një vizitë në dhomën e Thesarit, e cila dikur kishte shërbyer si hapësirë ku qytetarët mund të vinin fizikisht për të blerë bono thesari”, shtoi ai./teve1. info/
