Ministri në detyrë i Financave, Hekuran Murati, ka reaguar në Facebook duke njoftuar se tashmë janë alokuar 2.7 milionë euro në kategorinë e mallrave dhe shërbimeve, mjete të cilat janë të destinuara për pagesën e operatorëve të transportit publik në Prishtinë.
Murati tha se kjo shumë është proceduar veçmas nga 25.9 milionë euro të projekteve kapitale, pasi kapitalet kërkojnë kohë më të gjatë për finalizim dhe nuk ishte e mundur të kryheshin sot.
Sipas tij, vendimi i Kuvendit të Prishtinës për të hyrat vetanake ka kaluar verifikimin e ligjshmërisë nga MAPL dhe Ministria e Financave në “afat rekord”, ashtu siç u kishte premtuar përfaqësuesve të sindikatave.
“Para ditës së djeshme ka qenë e pamundur të kryhej ky proces sepse e premtja dhe fundjava nuk ishin ditë pune”, shkroi Murati.
Ai theksoi se Departamenti i Buxhetit ka qenë në kontakt të vazhdueshëm me zyrtarët financiarë të Komunës së Prishtinës gjatë gjithë ditës së sotme, duke i mbajtur të informuar për ecurinë e alokimit.
Murati akuzoi Komunën për dezinformim publik.
“Është për keqardhje sjellja dhe deklaratat dezinformuese nga ana e Komunës së Prishtinës se Ministria nuk po bën alokimin e mjeteve, kur në fakt edhe ata vetë e dinë që kemi të bëjmë me procedura që nuk mund të tejkalohen”.
Në fund, ai uroi që Komuna t’i ketë llogaritur saktë nevojat financiare kur ka ndarë vetëm 2.7 milionë euro, duke shtuar se tash i takon Komunës të shlyejë borxhet ndaj operatorëve të transportit publik për të përfunduar, siç e quajti, “farsën e bllokadës së pretenduar”.
