Deputeti i Lëvizjes Vetëvendosje, Hekuran Murati, ka reaguar ashpër ndaj vendimeve të fundit të Gjykatës Kushtetuese, duke e akuzuar atë për qasje të njëanshme dhe të varur nga përkatësitë partiake.
Murati thotë se vendimet e Gjykatës Kushtetuese “po varen nga ajo se cila parti është në pyetje”, dhe sipas tij, kjo nuk përfaqëson drejtësi, por një “arbitraritet klientelist” që ka për qëllim t’i japë pushtet atyre që nuk arritën ta fitojnë në zgjedhje.
Ai rikujton disa prej vendimeve të mëparshme të Kushtetueses, duke përmendur se në vitin 2014 Gjykata i kishte dhënë përparësi PDK-së, në mënyrë që të mbetej në pushtet. Sipas tij:
“1. Qeveria nuk mund të formohej pa fituesin e zgjedhjeve, pra PDK-në. Nëse nuk ishte PDK-ja në Qeveri, vendi duhej të shkonte në zgjedhje.
2. Pozita e Kryetarit të Kuvendit i takonte fituesit të zgjedhjeve, pra PDK-së, dhe deputetët s’kishin rrugë tjetër pos ta realizonin këtë, qoftë me votim të hapur, të fshehur, apo çfarëdo forme tjetër.”
Murati vazhdon me shembullin e vitit 2020, ku sipas tij, Gjykata Kushtetuese ndryshoi qasjen kur i dha të drejtë Presidentit të atëhershëm të mandatojë një qeveri pa fituesin e zgjedhjeve (VV-në).
Ai thekson se në vitin 2025, Gjykata ka bërë një tjetër kthesë, këtë herë duke vendosur që votimi për Kryetar Kuvendi të bëhet vetëm me votim të hapur dhe duke kufizuar numrin e tentimeve në tri, “sepse fituesi është Lëvizja Vetëvendosje”.
“Kjo e fakton padyshim se vendimet e kësaj Gjykate nuk bazohen në Kushtetutë, por në atë se cila parti është në pyetje”, theksoi Murati.
Në fund të reagimit të tij, ai paralajmëron se qytetarët do ta japin sërish përgjigjen në zgjedhje, ashtu siç bënë më 14 shkurt 2021.
