Ministri i Financave, Hekuran Murati, ka reaguar ndaj deklaratave të deputetit të PDK-së, Abelard Tahiri, lidhur me trajtimin e kategorive të dala nga lufta.
Në një reagim në Facebook, Murati ka kujtuar historikun e qeverisjeve të PDK-së dhe masat që janë ndërmarrë ndaj këtyre kategorive gjatë periudhave të mëhershme.
Sipas tij, herën e fundit që PDK ka qenë në pushtet, përmes koalicionit PAN (2017–2020), pensionet për veteranët, familjet e dëshmorëve dhe invalidët e luftës nuk janë rritur as për një cent.
“Herën e parafundit, në koalicion me LDK-në (2014–2017), PDK kishte fshirë nenin 18 të ligjit, i cili e lidhte pensionin e veteranit me pagën minimale”, ka deklaruar Murati.
Ai shpjegon se kjo ishte bërë me kërkesë të Fondit Monetar Ndërkombëtar (FMN), për shkak se listat e veteranëve kishin filluar të fryheshin me individë që nuk i plotësonin kriteret, duke rrezikuar seriozisht qëndrueshmërinë financiare të shtetit.
Murati gjithashtu thekson se pensionet për familjet e dëshmorëve dhe invalidët e luftës kurrë nuk kanë qenë të lidhura me pagën minimale, duke akuzuar Tahirin për mungesë njohurish mbi këtë temë.
Në kontrast me qeveritë e mëhershme, ai thekson se gjatë kohës së tij si ministër, pensionet për kategoritë e luftës janë rritur për së paku 20%./teve1.info/
