Deputeti i Lëvizjes Vetëvendosje, Hekuran Murati, ka reaguar pas publikimit të aktgjykimit të fundit të Gjykatës Kushtetuese lidhur me zhvillimet në Kuvend.
Ai ka akuzuar këtë institucion për qasje të ndryshme në interpretimin e Kushtetutës.
Murati ka shkruar në Facebook se Kryesuesi i Seancës Konstituive, Avni Dehari, dhe Grupi Parlamentar i LVV-së, kanë vepruar në përputhje të plotë me Kushtetutën që nga data 15 prill e deri më 26 korrik, duke u mbështetur në Aktgjykimin KO119/2014 të Gjykatës Kushtetuese.
Ai ka theksuar se Kushtetuta nuk ka ndryshuar që nga viti 2014, por sipas tij, ndryshimi ka ndodhur në mënyrën se si po e interpretojnë atë anëtarët e Gjykatës Kushtetuese, për shkak se tani fituese e zgjedhjeve është Lëvizja Vetëvendosje, dhe jo Partia Demokratike e Kosovës (PDK).
“Ky aktgjykim i publikuar dje, madje duket sikur është shkruar në zyrat e PDK-së, për dallim nga ai i datës 26 qershor, i cili megjithatë linte përshtypjen se kishte kontribut edhe nga vetë Gjykata”, ka shkruar Murati.
